fimmtudagur, júní 23, 2005
Ég er komin með nýtt missjon og rússneskir rithöfundar eru málið. Í fyrrasumar gaf Halldór Laxness lífi mínu lit en í ár eru það þeir félagar Tolstoj, Gogol, Dostojevitskí og fleiri góðir sem munu skemmta landnámskonunni þegar lítið er um túrhesta. Só far er ég búin að lesa Fávitann -sem ég reyndar las fyrir nokkrum árum og fannst ofsalega leiðinleg. En greinilega hafði ég ekki þroska í meira en Ísfólkið á mínum yngri árum því við seinni lestur þá fannst mér hún virkilega góð. Reyndar alveg æðisleg. Dauðar Sálir eftir Dostojevitskí er líka góð og sá helmingur af Glæpur og refsing sem ég er búin með er snilld. Fávitinn er samt bestur.
þriðjudagur, júní 14, 2005
Núna veit ég loksins hvert Reykvíkingar fara á kvöldin -þeir liðast allir upp Esjuna eins og marglitir maurar í útivistarjökkum. Ég, pabbi og litla gerpið ákváðum að slást í maurahópinn og tipluðum léttfætt upp fjallið, eins og við eigum kyn til, tókum fram úr hverjum silakeppinum á fætur öðrum og stóðum loks á tindinum með öðrum úthaldsgóðum borgarbúum. Í Esjuhlíðum gilda önnur siðalögmál en í borginni, á Esjunni heilsa allir, bjóða gott kvöld og brosa.
fimmtudagur, júní 09, 2005
Sem húsfreyjan á sjálfum Þjóðveldisbænum hef ég yfir að ráða einkar glæsilegri svefndyngju. Dyngja sú er fullbúin með sameiginlegri setustofu en aðilar þeir er þangað fjölmenna eru í nokkuð ólíkum aldurs- og kynjahóp en téð húsfreyja. Allt eru þetta hinir mestu sóma- og herramenn og hafa mörg áhugamál, blöðin eru lesin af kappi, dæst, kaffi drukkið i lítravís semog horft á hvern einn og einasta frétta- menningar- viðræðu- og sérstaklega íþróttaviðburð sem fjölmiðlar bjóða upp á. Það er að segja áður en húsfreyjan flutti til þeirra. Verandi þeir sjentilmenni sem þeir eru, hafa þessi sómamenn látið mig um yfirráðin yfir fjarstýringunni þegar mér þóknast að heiðra þá með nærveru minni og ég hef í staðinn kynnt þá fyrir ýmsum nýjum hlutum. Nágrannar eru orðnir hádegishefð og Simpson kvöldhefð en um tilvist þeirra var ekki áður vitað (Grannar eru reyndar að verða nokkuð vinsælir..). Í kvöld bauð ég upp á spennandi dagskrá: Hálandahöfðinginn, The Apprentice og svo rúsínan í pylsuendanum MileHigh. Lauslátar, ljóshærðar og drykkfeldar flugfreyjur/flugmenn eru klassa sónvarpsefni hvort sem þú er menningarlegur, íþróttasinnaður karlmaður á sextugsaldri eða kvennkyns háskólarotta.