sunnudagur, apríl 23, 2006
Vorið kemur sko með fleira skemmtilegt en fuglaflensuna og lóuna -Söngvakeppni evrópskra sjónvarpsstöðva er líka á vorin. Samnorræni Eurovision þátturinn er líka tær snilld og ég skemmti mér alveg konunglega yfir honum í gærkveldi. Þessir norrænu "spekingar" eru líka alveg bíó og ég get varla gert upp á milli hvert þeirra mér finnst best. Jú og þó, Tómas finnski er skemmtilegastur. Kann reyndar líka vel við norsarann Jóstein sem gefur bara fimm stjörnur eða núll og svo stendur eðaltöffarinn Eiki Hauksson alltaf fyrir sínu. Sænska gellan var líka fyndin, sveiflandi hárinu og flissandi daðurslega við hvert tækifæri og danski gaurinn kom bara með alveg stórfurðuleg komment. Kunni líka vel við þau. Tek eiginlega bara undir með Hlíbbinu, eini gallinn á þessum þætti er að bíða í heila viku eftir þeim næsta.
sunnudagur, apríl 16, 2006
Gleðilega páska,
og súkkulaði gáska
vonandi lendiði ekki í miklum háska.
eftir að éta allt þetta súkkulaði.
mánudagur, apríl 10, 2006
Ímyndið ykkur bara krakkar mínir. Ferðalög, nýjir staðir, siðfágað og gáfað fólk, endalaus kokteilboð og veislur og allt þetta á launum. Hljómar eins og draumur í dós ekki satt? Ég eyddi helginni í alveg sérdeilis skemmtilega ráðstefnu NordicMun uppi í HR og kynntist þessu "framtíðarstarfi" mínu aðeins. Þar lék ég hlutverk Perú í öryggisráði Sameinuðu Þjóðanna og plottaði meðal annars samstöðu þróunarlanda og reyndi að pota inn alveg fáránlega óviðeigandi klásúlu í samninga ásamt hinum þróunarlöndunum, gerðist höll undir rússa (sem er alveg bannað fyrir S-Ameríkuland) og kynntist fullt af skemmtilegu fólki.
Það sem stendur upp úr eftir helgina var í fyrsta lagi alveg svakalega skemmtilegt námskeið í samningatækni sem maður að nafni Aðalsteinn Leifsson hélt fyrir okkur. Hef nú bara ekki upplifað það áður að sitja stanslaust í tvo og hálfan klukkutíma og missa ekki athyglina í eitt sekúntubrot. Mjög svekkt að vera ekki í HR því þá mundi ég taka kúrsinn hjá kallinum. Háskólinn í Reykjavík kom sterkt inn hjá þáttakendum, það er bara ekkert smá hvað þeir hugsa vel um nemendurna sína! Rektorinn og rekstrarstjórinn stjönuðu við okkur eins og við værum börnin þeirra og voru bara alveg yndislegar á alla kanta. Já og svo má ekki gleyma klósettunum, þar eru snyrtivörur í boði HR -takk fyrir kærlega. Annað sem stendur eftir var svo að fara í kokteilboð með sjálfum Hans Blix og tjatta aðeins við kjallinn. Ekkert smá gaman að fá að tala við hann persónulega og skiptast á skoðunum. Þetta er annars alveg yndislega sjarmerandi kall. Tók þó alveg steininn úr þegar hann var kominn í myndatöku með fimm stelpum en þá kom konan hans, sem var líka alveg jafn krúttleg, og dró hann burtu. Sagðist óttast um kallinn sinn með öllum þessum skvísum og svo hurfu þau flissandi á brott.
Stór hluti af dagskránni hjá okkur var einmitt kokteilboð og djamm þannig að heilsan á laugardeginum var, eftir tveggja tíma svefn, eftir aðstæðum. Var reyndar bara furðu hress megnið af deginum en í boði hjá Ólafi Ragnari á Bessastöðum helltist yfir mig þessi svakalega þynnka. Stóð í hring með Óla, tveimur norrænum sendiherrum og einum öðrum háskólanema og átti að heita í málefnalegum umræðum. Langaði hinsvegar mest að æla á skónna hans Ólafs og veit ekki hversu málefnaleg ég var í þessu ástandi hehehe. Enda hef ég það frá áreiðanlegum heimildum að alvöru diplómatar drekka ekki í kokteilboðum -þeir vinna. Ég sem gervi-diplómati mátti hinsvegar vera full og ógeðsleg. Takk fyrir það.
miðvikudagur, apríl 05, 2006
Ég er með munnangur. Það er vont.
laugardagur, apríl 01, 2006
Já ég segi bévítans. Sólin er yndisleg þegar maður getur baðað sig í henni, rölt úti í góða veðrinu, farið í sund og fengið sér pulsu. En þegar maður þarf að sitja við kvistglugga, sem dregur í alla geisla sólarinnar frá klukkan 12 á hádegi til sólarlags, er sólin ekki vinkona mín lengur. Vetrarlærdómur er miklu meira kósí en sumarlærdómur. Meðan sólin bræðir rómantísku lærdómskertin mín niður og ég sit og svitna yfir fræðunum, hugsa ég hlýtt til Vetur konungs. Yfir veturinn get ég allavega hrósað happi yfir að kúra mig inni í þykkri flíspeysu og drekka heitt kaffi meðan vindurinn næðir úti.
En ó vell, tveir mánuðir eftir af skólanum segiði. Hverjar ætli séu líkurnar á að einum nemanda takist að klóra sig fram úr nokkrum litlum verkefnum. Svo sem eins og: tveimur 20% verkefnum, einni 30% ritgerð, tveimur lokaprófum, BA ritgerð, taka viðtöl og ráða fólk í sumarstarf, finna mér sumarstarf, sækja um skóla erlendis, taka TOEFL próf, taka þátt í NORDmun ráðstefnu, halda ræðu á sagnfræðingamálþingi. Já, held þetta sé komið. Ég er að spá í að stofna veðpott með framvindu þessarra mála. Æsispennandi veðmál í gangi. Mun Gerði takast að krafsa sig fram úr þessari dagskrá með góðum árangri eða skítur hún langt upp á bak? Stay tuned.